ទោះបីជាមានការវិវឌ្ឍន៍ខ្លះនៅក្នុងប្រទេសកម្ពុជាក្នុងរយៈពេលបីឆ្នាំចុងក្រោយ (២០១៩-២០២១) ប៉ុន្តែបញ្ហាដែលប៉ះពាល់ដល់កុមារនៅតែមាន ហើយក្នុងករណីខ្លះកាន់តែធ្ងន់ធ្ងរទៅៗ។ ទាំងនេះ ភាគច្រើនដោយសារតែផលប៉ះពាល់សេដ្ឋកិច្ចសង្គម កើតចេញពីវិបត្តិនៃជំងឺ កូវីដ១៩ និងការកើនឡើងនៃផលប៉ះពាល់ពីការប្រែប្រួលអាកាសធាតុ និងការរិចរិលបរិស្ថាន ដែលប៉ះពាល់ជាគំហុកទៅដល់គ្រួសារងាយរងគ្រោះ និងក្រីក្រ (ជាពិសេសកុមារកំព្រា ជនជាតិដើមភាគតិច និងជនមានពិការភាព)។
នៅឆ្នាំ ២០២១ កម្មវិធីអភិវឌ្ឍន៍អង្គការសហប្រជាជាតិ ហៅកាត់ថា UNDP បានប៉ាន់ប្រមាណថា អត្រានៃភាពក្រីក្រនៅកម្ពុជា បានកើនឡើងជិតពីរដង រហូតដល់ ១៧.៦% នៃចំនួនប្រជាជនសរុប ១៦.៧ លាននាក់ ដោយសារគ្រួសារបាត់បង់ប្រភពចំណូល និងទទួលយកប្រាក់កម្ចី។
កុមារ និងយុវជន មិនត្រូវបានផ្តល់សិទ្ធិអំណាចក្នុងការបញ្ចេញសម្លេងរបស់ពួកគេ នៅថ្នាក់មូលដ្ឋាន និងថ្នាក់ជាតិឡើយ ហើយការចូលរួមរបស់កុមារប្រកបដោយអត្ថន័យ គឺខ្វះខាតនៅក្នុងការសម្រេចចិត្តរបស់រដ្ឋាភិបាល។ នេះជាករណីពិសេសសម្រាប់កុមារី និងកុមារដែលមានទិន្នាការភេទចម្រុះ។
ភាពក្រីក្រ ជំរុញឱ្យមានការរំលោភសិទ្ធិកុមារ រួមទាំង ការទទួលបានការអប់រំ និងសេវាសុខភាព ពលកម្មកុមារ ការជួញដូរ ការរំលោភបំពាន និងភាពងាយរងគ្រោះទៅនឹងមហន្តរាយផ្សេងៗ។ ស្ទើរតែពាក់កណ្តាលនៃប្រជាជនកម្ពុជា ដែលរស់នៅក្នុងភាពក្រីក្រមានអាយុ ១៩ឆ្នាំ ឬក្មេងជាងនេះ។ ស្ថានភាពកាន់តែធ្ងន់ធ្ងរឡើងជាមួយបញ្ហាកូវីដ១៩ ដែលការវាយតម្លៃផ្ទាល់ខ្លួនរបស់អង្គការ Save the Children ប្រចាំប្រទេសកម្ពុជា លើផលប៉ះពាល់នៃជំងឺកូវីដ១៩ ក្នុងឆ្នាំ២០២០ បានបង្ហាញថា ៨៤% នៃគ្រួសារដែលបានស្ទង់មតិ កំពុងមានបញ្ហាក្នុងការចំណាយលើសម្ភារៈប្រើប្រាស់សំខាន់ៗ ខណៈដែលកូនៗរបស់ពួកគេ ទទួលរបបអាហារចម្រុះបានតិចតួច ហើយមានតម្លៃថ្លៃ ស្របពេលដែលបាត់បង់ប្រាក់ចំណូល។
ពួកយើង គឺជាអង្គការសិទិ្ធកុមារឯករាជ្យធំជាងគេបំផុតនៅលើពិភពលោក ដែលធ្វើការក្នុងប្រទេសជាង ១២០ រួមទាំងក្នុងប្រទេសកម្ពុជា ចាប់តាំងពីឆ្នាំ ១៩៧០។ ការងាររបស់យើងទាក់ទងទៅនឹងកម្មវិធីគាំពារនិងអភិវឌ្ឍន៍កុមារតូច ការអប់រំមូលដ្ឋាន សិទ្ធិកុមារ ការការពារកុមារ សុខភាព និងអាហារូបត្ថម្ភ ភាពក្រីក្ររបស់កុមារ និងការកាត់បន្ថយគ្រោះមហន្តរាយ។
តើផែនការយុទ្ធសាស្ត្រប្រចាំប្រទេសរបស់អង្គការ Save the Children ឆ្នាំ២០២២-២០២៤ គឺជាអ្វី?
ផែនការយុទ្ធសាស្ត្រប្រចាំប្រទេស ឆ្នាំ២០២២-២០២៤ គឺជាលទ្ធផលនៃការវិភាគភស្តុតាង ការវាយតម្លៃលើការសិក្សារបស់យើង និងការពិគ្រោះយោបល់ជាមួយអ្នកពាក់ព័ន្ធអំពីបញ្ហាដែលកុមារ កំពុងប្រឈមនៅក្នុងប្រទេសកម្ពុជានាពេលបច្ចុប្បន្ននេះ។
ផែនការយុទ្ធសាស្ត្រប្រចាំប្រទេស បង្ហាញពីរបៀបដែលជំនាញ ធនធាន ភាពជាដៃគូ និងបច្ចេកទេសរបស់យើង នឹងរៀបចំកម្មវិធីប្រកបដោយជោគជ័យស្របតាមមាត្រដ្ឋាន ច្នៃប្រឌិត ដើម្បីដោះស្រាយបញ្ហាប្រឈមនានា ដែលបន្តកើតមានសម្រាប់កុមារ និងធ្វើជាសម្លេងសម្រាប់សិទ្ធិកុមារនៅកម្ពុជា។
ជាលទ្ធផល គោលដៅយុទ្ធសាស្ត្រចំនួន ៤ ត្រូវបានជ្រើសរើស ដែលទាំងអស់នេះ រួមចំណែកដល់មហិច្ឆតាសកលរបស់អង្គការ Save the Children សម្រាប់កុមារ ដែលកុមារ អាចរស់រានមានជីវិត ទទួលបានការអប់រំ និងត្រូវបានការពារ នៅឆ្នាំ២០៣០។
ក្នុងរយៈពេលបីឆ្នាំចុងក្រោយ (២០១៩-២០២១) យើង បានជួយគាំទ្រដោយផ្ទាល់ដល់ប្រជាពលរដ្ឋសរុប ១៧១,២១០នាក់ ក្នុងនោះមានកុមារ ១១៦,៥០២នាក់ និងមនុស្សជាង ៦.៧ លាននាក់ដោយប្រយោល។
នៅឆ្នាំ ២០២១ យើង បានគាំទ្រដល់ប្រជាពលរដ្ឋជាង ១៤០,៨៦០នាក់ ដែលក្នុងនោះ ៧៩,៦៧០នាក់ជាកុមារ។ យើង បានគាំទ្រដល់មនុស្សជាង ២.៥លាននាក់ដោយប្រយោល តាមរយៈយុទ្ធនាការ និងសកម្មភាពផ្សព្វផ្សាយរបស់យើង។
#5, St. 242,
Sangkat Chaktomuk,
Phnom Penh,
Cambodia
info.cambodia@savethechildren.org
Tel: +855 (0) 23 223 403/4/5/6
